7-8 чэрвеня 2025 года творчыя калектывы “Паўлінка” і “Пралескі” Цэнтра беларускай культуры Дома адзінства прынялі ўдзел у двух святочных канцэртах у Польшчы.
Першы канцэрт прайшоў суботнім вечарам у маляўнічай вёсцы Мацковічы Падляскага ваяводства. У мясцовым доме культуры сабраліся ўсе жыхары наваколля, каб далучыцца да беларускай песеннай культуры.
На наступны дзень, у нядзелю, адбыўся маштабны канцэрт 40-га Свята беларускай культуры. На плошчы каля драматычнага тэатра была ўстаноўлена вялікая сцэна, на якой вакальныя і танцавальныя ансамблі змянялі адзін аднаго пад апладысменты шматлікіх гледачоў.
Адным з першых выступіў вакальны ансамбль “Пралескі” (мастацкі кіраўнік Анастасія Лукашэнак), выканаўшы песні на беларускай і латышскай мовах. У сваю чаргу тэатральная студыя “Паўлінка” (мастацкі кіраўнік Інэса Казлоўская) прадставіла польскім слухачам акапэльнае выкананне народных песень Палесся. Пад іх забіяцкую песню сольны танец Марыны Медунецкай (мастацкі кіраўнік танцавальнага ансамбля “Лянок”) дадаў экспрэсіі выступу. Гледачы праводзілі самадзейных артыстаў з Даўгаўпілса шчодрымі апладысментамі.
Паездка ў Беласток умацавала плённае супрацоўніцтва Цэнтра беларускай культуры Дома адзінства і Беларускага грамадска-культурнага таварыства ў Польшчы. З візітам у адказ ансамбль з Беластока восенню прыедзе на Міжнародны фестываль “Беларускі кірмаш у Даўгаўпілсе”.
https://www.bkc.daugavpils.lv/be/home/11-newsru/764-belostoka-notika-xxxkh-baltkrievu-kulturas-svetki?print=1&tmpl=component#sigProId0a1d145647
Інфармацыя падрыхтавана:
Цэнтр беларускай культуры