У чацвер, 2 чэрвеня 2020 года, дэлегацыя Даўгаўпілскага Цэнтра беларускай культуры (ЦБК) і Беларускага культурна-асветніцкага таварыства “Уздым” правялі флэшмоб “Віват, Беларусь!” у Генеральным консульстве Рэспублікі Беларусь у Даўгаўпілсе. У такім нечаканым фармаце беларусы Даўгаўпілса павіншавалі радзіму з дзяржаўным святам – Днём Незалежнасці.
https://www.bkc.daugavpils.lv/be/home/11-newsru/402-u-da-ga-pilse-prajsho-fleshmob-vivat-belarus?print=1&tmpl=component#sigProId62af01ce2c
Дзень Незалежнасці Рэспублікі Беларусь, альбо Дзень Рэспублікі – галоўнае свята беларускай дзяржаўнасці, якое адзначаецца 3 ліпеня. З гэтым важным і знамянальным святам прадстаўнікоў Генконсульства павіншавала творчая дэлегацыя беларусаў Даўгаўпілса.
У яркіх народных строях, з паветранымі шарамі ў руках, дзятва дзіцячай студыі “Скарбніца”, супрацоўнікі ЦБК і члены Праўлення “Уздыма” прайшліся па сонечных вуліцах горада.
На тэрыторыі Генконсульства іх гасцінна сустрэлі в.а. Генеральнага консула РБ у Даўгаўпілсе Яўгенія Барткевіч, консул Мікалай Раманкевіч, супрацоўнікі дыпламатычнай установы. Дырэктар ЦБК і старшыня “Уздыма” Жанна Раманоўская ў віншавальнай прамове пажадала Рэспубліцы Беларусь “заўсёды быць шчаслівай: мірнай, здаровай, багатай, моцнай і свабоднай”, уручыла дыпламатам кветкавыя букеты. Дзеці пад апладысменты прысутных натхнёна праспявала песню “Беларусь чароўная”. А потым у мірнае блакітнае неба ўзляцелі чырвона-зялёна-белыя шары ў колерах беларускага дзяржаўнага сцяга.
Свята завяршылася пазнавальнай экскурсіяй па будынку Генконсульства, праведзенай Яўгеніяй Барткевіч, а за кубкам гарбаты яшчэ працягнулася цікавая гутарка з дыпламатамі.
З Днём Незалежнасці, Беларусь!
Інфармацыя падрыхтавана:
Цэнтр беларускай культуры,
Марыя Памецька, метадыст ЦБК