23 лістапада 2018 года ў канцэртнай зале Дома Адзінства прайшоў Гала-канцэрт VIII Міжнароднага фестывалю народнай культуры «Беларускі кірмаш у Даўгаўпілсе», у якім прынялі ўдзел беларускія творчыя калектывы і ўдзельнікі з Латвіі, Літвы, Эстоніі і Беларусі. У гэтым годзе восеньскі фестываль быў прысвечаны 100-годдзю Латвійскай Рэспублікі і стаў лагічным завяршэннем праекта Даўгаўпілскага Цэнтра беларускай культуры (ЦБК) «Куфар беларускіх скарбаў».
https://www.bkc.daugavpils.lv/be/home/11-newsru/268-u-vosmy-raz-adshume-vyasjoly-belaruski-kirmash?print=1&tmpl=component#sigProIdd6749d9207
Што такое восеньскі кірмаш? Гэта не проста сезонны рынак, кірмаш з гандлёвымі месцамі. Гэта перш за ўсё масавае народнае свята, у аснове якога ляжаць старадаўнія традыцыі, звязаныя не толькі з гандлем, але і шумнымі вясёлымі народнымі гуляннямі. Станаўленне кірмашоў мае сваю шматвяковую гісторыю. Ужо з часоў сярэдневякоўя кірмашы былі адной з найважнейшых падзей у грамадстве, своеасаблівым займальным цэнтрам.
Фестываль «Беларускі кірмаш у Даўгаўпілсе», які ўпершыню адбыўся ў 2011 годзе, з падзеі мясцовага значэння ператварыўся ў міжнародны форум, які аб'ядноўвае самадзейныя беларускія калектывы Латвіі, Літвы, Эстоніі і, вядома ж, Беларусі. Восьмы па ліку фестываль дадаў у сваю яркую палітру новыя фарбы, фарматы, знаёмствы.
Фестываль праходзіў два дні і адкрыўся 23 лістапада ў ЦБК канферэнцыяй «Культурны мост: Латвія - Літва - Эстонія - Расія - Беларусь", на якой адбываецца абмен дэлегацый ідэямі, завязваюцца новыя двухбаковыя кантакты.
Задоўга да пачатку Гала-канцэрта ў фае Дома Адзінства ўжо было шматлюдна. Тут разгарнулася традыцыйная рамесная выстава, на якой народныя ўмельцы з Міёраў, Браслава, Дуброўны рэкламавалі вырабы беларускага дэкаратыўна-прыкладнога мастацтва і навучалі іх вырабляць. Вялікую цікавасць выклікаў прэзентацыйны стол «Адкрый для сябе Беларусь», дзе можна было азнаёміцца з рэкламнымі буклетамі пра Беларусь і абмяняць кнігу на беларускай мове на сувенір; а таксама багаты стол з дарункамі прыроды, сабранымі і нарыхтаванымі членамі беларускага культурна-асветніцкага таварыства «Уздым».
Асноўную тэатралізавана-музычную імпрэзу Гала-канцэрта выканалі даўгаўпілскія беларускія калектывы: ансамбль беларускай народнай песні "Купалінка", танцавальны ансамбль "Лянок", вакальна-інструментальны ансамбль "Пралескі", харавая капэла «Спадчына», тэатральная студыя «Паўлінка», якія прадэманстравалі ў сваіх песнях, танцах і тэатральных мініяцюрах духоўную і матэрыяльную спадчыну беларусаў. Бо на працягу года кожны месяц у свой «Куфар беларускіх скарбаў» мы складвалі сакральныя аўтэнтычныя вырабы: вышытыя ручнікі, плеценыя паясы, пашытыя нацыянальныя касцюмы, тканыя абрусы, дываны, ільняное палатно, кілімкі і г.д., якія на канцэрце даставалі з куфра і дэманстравалі гледачам.
Фестываль адкрыў 1-й намеснік старшыні Даўгаўпілскай гарадской думы Ігар Прэлатаў, які адзначыў яго ўнікальны фармат ў культурным асяроддзі Даўгаўпілса.
Надзвычайны і Паўнамоцны Пасол Рэспублікі Беларусь у Латвійскай Рэспубліцы Васіль Марковіч у сваім віншаванні падкрэсліў аб'яднальную ролю Цэнтра беларускай культуры і беларускага таварыства «Уздым» у справе захавання і папулярызацыі беларускай культуры ў Латвіі. Дарэчы, Міністэрства замежных спраў РБ 25-гадовую паспяховую дзейнасць «Уздыма» адзначыла Ганаровай граматай за подпісам міністра замежных спраў Уладзіміра Макея; пасол Беларусі ўручыў гэтую ўзнагароду старшыні арганізацыі Жанне Раманоўскай.
Удзельнікаў і гасцей фестывалю павітала консул-саветнік Генеральнага Консульства Расійскай Федэрацыі ў Даўгаўпілсе Наталля Пуставалава.
Вядучыя канцэрта – Жанна Раманоўская і Уладзімір Стасевіч, прадставілі ганаровых гасцей фестывалю: Генеральнага консула РБ у Даўгаўпілсе Уладзіміра Клімава, 1-га сакратара Пасольства РБ у Латвіі Аляксея Васількова, консулаў РБ у Даўгаўпілсе Яўгенію Барткевіч і Мікалая Раманкевіча, ганаровага консула РБ у г.Клайпеда Літоўскай Рэспублікі Мікалая Логвіна; дэлегацыі беларускіх партнёраў з Віцебскага дзяржаўнага ўніверсітэта, Наваполацка, Міёраў, Браслава, Дуброўны, Нарачанскага санаторыя «Спадарожнік», г.Светлагорска (Расія).
А потым закружылася-панеслася музычна-тэатралізаванае дзейства, якое традыцыйна пачалося з запальнай песні-гімна "Кірмаш-кірмашок» і працягнулася прыгожымі танцамі з ручнікамі і дыванамі, песнямі і невялікімі тэатральнымі замалёўкамі з удзелам усіх творчых калектываў ЦБК; паэт Станіслаў Валодзька прачытаў свой верш «Да 100-годдзя Латвіі», а салістка Зінаіда Сіліня акапэльна праспявала жартоўную песню.
Ну і, вядома ж, які беларускі Кірмаш абыходзіцца без гасцей? Як толькі на сцэну з першым танцам і песняй літаральна вылецеў-выпырхнуў Заслужаны аматарскі калектыў Рэспублікі Беларусь, дзіцячы харэаграфічны ансамбль «Камарыкі» ім.Чэслава Клячко Палаца культуры «Нафтан» г.Наваполацка (кіраўніца Святлана Багаслаў), уся зала выбухнула бурнымі авацыямі. Звонкія галасы краналі да глыбіні душы, а іскрамётныя танцы нікому не давалі спакойна ўседзець на месцы – ногі самі пускаліся ў скокі.
Яркія, незабыўныя выступленні гасцявых калектываў: Заслужанага калектыву Рэспублікі Беларусь, народнага ансамбля песні і музыкі "Крыніца" з Дуброўны, саліста Сяргея Шабадалава з Вісагінаса (Літва), дзіцячага ансамбля «Буслікі» з Таліна (Эстонія), дуэта Дар'і і Яўгеніі Шук з Міёраў нікога не пакінулі абыякавымі. Скляпенні залы, запоўненай гледачамі, дрыжалі ад апладысментаў і воклічаў «Брава!».
Пасля феерычнага канцэрта ўсе калектывы і салісты, якія падарылі гледачам самыя яркія і добрыя эмоцыі і ўражанні, а таксама рамеснікі, беларускае таварыства «Уздым», кіраўніца мастацкай студыі ЦБК «Каларытны свет» Вэлта Лоцэ (аўтар карціны-банэра фестывалю), былі адзначаны дыпломамі, падарункамі і кветкамі.
У фестываля ёсць яшчэ адна добрая традыцыя – зачыняць яго агульнай песняй "Беларускі дом" (словы С.Валодзькі, музыка А.Рудзя). Удзячныя гледачы стоячы, вельмі актыўна і дружна падпявалі артыстам. І, разітваючыся, сардэчна дзякавалі Цэнтру беларускай культуры за выдатна арганізаванае свята, выказваючы надзею на сустрэчу ў наступным годзе.
Кіраўніца Цэнтра беларускай культуры і старшыня таварыства «Уздым» Жанна Раманоўская адзначыла: «Наш фестываль расце і дынамічна развіваецца. Штогод мы прапануем гледачам цікавы сюжэт і новыя ідэі, запрашаем яркіх артыстаў, падпісваем дамовы аб супрацоўніцтве, ахвотна дзелімся вопытам і пашыраем межы дружбы беларусаў Балтыі. У гэтым годзе рады нашых партнёраў папоўнілі землякі Калінінградскай вобласці. А ў наступным годзе фестываль атрымае канкрэтную часовую прывязку – другія выхадныя кастрычніка, вернецца ў вялікую залу Палаца культуры і пройдзе пад знакам 20-годдзя Цэнтра беларускай культуры і 100-годдзя Рэспублікі Беларусь».
Цэнтр беларускай культуры выказвае шчырую падзяку за падтрымку ў арганізацыі фестывалю Даўгаўпілскай гарадской думе, Упраўленню культуры, Генеральнаму консульству Рэспублікі Беларусь у Даўгаўпілсе, Цэнтру латышскай культуры, Арт-цэнтру ім.Марка Роткі, муніцыпальнай паліцыі і сродкам масавай інфармацыі г.Даўгаўпілса.
Інфармацыя падрыхтавана:
Цэнтр беларускай культуры,
Марыя Памецька, метадыст ЦБК,
т. 654 24695, 29811969, Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду.
г.Даўгаўпілс, вул.Алеяс, 68-1A